A reconquista do Casco Vello
Vigo naceu como cidade ao carón do mar e foi espallándose ata crear a configuración urbanística que hoxe ten, dándolle as costas ao que foi a súa orixe como cidade. Durante moitos anos o casco histórico no que agromou Vigo foi o grande esquecido. Ao tempo que a cidade medraba, o Casco Vello esmorecía. Pouco a pouco foise degradando urbanisticamente, perdendo poboación e converténdose nunha illa no centro da cidade. Pero esa situación está a mudar. Hoxe calquera que pase polo barrio poder comprobar que algo está a cambiar e que a súa rehabilitación integral está a deixar de ser unha quimera.
Cando aceptei a miña responsabilidade como tenente de alcalde e concelleiro de Cascos Históricos asumín o firme compromiso de conseguir que o Casco Vello “reviva”, que sexa de novo o sinal da nosa identidade como cidade. É unha tarefa na que os nacionalistas estamos absolutamente implicados e que empeza a dar xa os seus froitos.
As actuacións que estamos a desenvolver abranguen a rehabilitación de edificios, pero tamén a dinamización social, a mellora da calidade de vida dos seus veciños e veciñas, a reforma do entramado viario ou a mobilidade. Porque a reconquista do Casco Vello precisa dunha actuación integral que recomponña todas as pezas deste gran puzlle que é a zona histórica. Nestes dous anos desde o Concello de Vigo tense destinado ao Casco Vello o maior investimento directo da súa historia. Dos orzamentos municipais saíron máis de 6 millóns de euros para a recuperación da zona antiga e o vindeiro ano intensificaremos ese ritmo inversor. A ese orzamento hai que engadir outros 10 millóns de euros do Plan de Investimento Local que quixemos destinar ao barrio, así como os máis de 18 millóns de euros adicados polo Consorcio do Casco Vello á rehabilitación de inmobles. Sen dúbida, nunca antes se achegaron tantos fondos para facer que sexa de novo o cerne da cidade.
As obras que enchen o casco histórico son a mellor proba de que hai un compromiso político firme pola súa recuperación. Á reforma de 19 rúas e á rehabilitación de ao redor de 60 edificios que se desenvolven desde o Concello e o Consorcio, hai que engadir as axudas aos particulares para a rehabilitación de fachadas e cubertas e actuacións en interiores en vivendas e locais comercias. Os proxectos para a apertura da Pinacoteca e o Centro Fotográfico Galego, o programa de limpeza de pintadas, os Coidadores do Barrio, a intalación dunha rede de banda ancha Wimax… son algunhas das pezas que estamos artellando para rematar o puzzle.
Un puzzle no que xoga un papel fundamental a mellora da mobilidade. É unha peza clave conseguir que os desprazamentos polo barrio sexan cómodos e accesibles e que exista unha boa conexión entre as zonas alta e baixa do casco histórico. Precisamente ese é un dos obxectivos da reforma do entramado viario que estamos a desenvolver, cun orzamento de 10 millóns de euros. Nomeadamente a remodelación do eixo Porta do Sol-Elduayen-Paseo de Alfonso vai ser un aspecto determinante para mellorar a conexión entre a parte alta e baixa do barrio. Deixará de ser unha barreira que separa para transformarse nun espazo de unión do barrio e encontro da cidadanía.
No plan de mobilidade que temos para o Casco Vello inclúese tamén a proposta do servizo de transporte público con microbuses eléctricos que poñeremos en marcha o vindeiro ano. Aínda que a nova Xunta desbotou financiar o proxecto do funicular para unir O Berbés co castelo de San Sebastián, como tiña previsto a anterior Consellería de Vivenda, estamos decididos a levar o proxecto adiante, xa que entendemos que é básico, non só para facilitar as comunicacións do barrio, senon tamén para a rexeneración dunha zona tan emblemática como O Berbés.
É certo que aínda queda moito traballo por diante para conseguir que o Casco Vello estea na súa totalidade rehabilitado, pero ninguén pode poñer en dúbida que a transformación é xa un feito. Alomenos no cincuenta por ciento do barrio é xa tanxible, é unha realidade. Nestes dous anos temos iniciado un proceso que non ten volta atrás, un proceso que fará que a cidade recupere para a cidadanía o lugar no que naceu.
Etiquetas: Casco Vello, dinamización, identidade, investimento, reconquista, reforma, rehabilitación, rúas, urbanismo
18 de Febreiro do 2010 ás 6:56 pm
Hola Santi:
A verdade é que non teño moi boas palabras para o BNG en Vigo, ” a los hechos me repito” como dixo manquiña. Teño que dicir por outra banda que coñézote (polas túas accións) dende o comezo da túa carreira política, sei o ben que fixeches ao deporte base en Vigo, e iso seino porque son moi aficionado o basket, e lembraraste como fomos desterrados en castrelos.
Agora vivo no casco vello e o outro día tivemos unha reunión con calviño e toxo (o de patrimonio). Moi claro non quedaron as cousas…
Todos estamos dacordo en que non é estético ter un casco vello reformado e cheo de coches polas rúas, pero o que esperabamos que nos deran resposta o outro día é “¿Onde metemos os 500 coches do casco vello?”.
Cosa que non se fixo. En lugares de dar alternativas aquilo converteuse nunha loita de problemas particulares (que xa existían antes desta normativa) e de baile de números por parte do membros do consistorio (que aínda defende que quedan 102 prazas para aparcar xa que a zona azul de cánovas do Castillo é considerada como prazas de residentes, ejem!! ).
Gustaríame coñecer alternativas posibles e que se defendesen no noso consistorio.
Alternativas para os autos do casco vello 1,2,3 conteste outra vez:
-Poñer un aparcadoiro municipal ó aire libre cun custo moi reducido(menos de 30€/mes) en calquer parte de cidade controlado 24h por un vixiante, e poñer lanzadeiras (bus) gratuitas dende o casco vello ó aparcadoiro a tódolos usuarios do mesmo. Isto sería unha solución moi boa tanto para a xente maior que non adoita a usar o coche tódolos días como para os que non se poden permitir unha praza que vai dende os 93 os 140€.
¿xogamos? 1,23, conteste outra vez…
——–
RESPOSTA
Aprezado Xacobe:
Alédome que coincidamos no punto de partida, que é o feito de que o proceso de recuperación do Casco Vello non pode desenvolverse se o barrio é un aparcadoiro do coches. Dito isto, o certo é que o Concello xa está dando alternativas. En ningunha outra zona da cidade se ten posto en marcha un plan de axudas para que os veciños e veciñas podan ter descontos nos parkings soterrados. Moi mala non debe ser a medida, cando estamos recibindo protestas doutras zonas da cidade pedindo que tamén se lles subvencione a eles o aparcamento.
Por outra parte, desde a Concellería de Patrimonio Histórico estase tamén traballando para incorporar modificacións no Pepri e permitir que os baixos dos inmobles podan empregarse como garaxes. Son algunhas das alternativas que estamos ofrecendo aos veciños e veciñas, pero o que o Concello de Vigo non pode é resolver cada un dos problemas particulares, que como ti ben dis son os que ao fin e ao cabo acaban saíndo a luz cando se fala dos problemas de aparcamento no Casco Vello.
Imos seguir traballando pola recuperación do barrio e por conseguir que os seus veciños e veciñas teñan unha mellor calidade de vida, pero para elo precisamos ter tamén a vosa colaboración.
Unha aperta.
17 de Febreiro do 2010 ás 5:26 am
Ola Santi ,
As milloras no casco vello nótanse, como dís . Sei que os proxectos de dinamización van e irán adiante e todos son válidos . O importante é que o casco vello viva , xa sexa pola xente que vive e vivirá nela ou pola xente que decida pasar , pasear e gastar parte do seu tempo e os seus cartos nesta zona. Dicía Cesar Portela que as prazas tiñan que recuperar esa función de lugar de encontro e de negocio que tiñan noutros tempos . Eu que tamén estou dacordo con esa idea animo a que ademais da apertura de novas tendas , outlet ou non, seguir os pasos da praza da Constitución e de tantas prazas de cascos vellos de toda Europa para convertir o resto das suas prazas neses lugares de encontro e de negocio ca creación de mercados de todo tipo que poidan funcionar na fin de semana así como facilitar para que ditas prazas podan ser ocupadas por cafes e restaurantes con terrazas que axuden a covertir o casco vello no lugar de reunión , de encontro de todolos vigueses.
Ánimo e a seguir , que ides ben.
——–
RESPOSTA
Aprezado Xosé:
Grazas polo teu apoio. Podes estar certo de que imos seguir traballando na recuperación do Casco Vello para a cidadanía e ademáis dos proxectos que xa están en marcha imos seguir impulsando a súa dinamización social para facer que a xente volte ao noso barrio histórico, pero tamén precisamos que a iniciativa privada de implique. Moitas grazas polas túas suxestións.
Un saúdo.
28 de Novembro do 2009 ás 11:32 pm
Hola!!!!!Como comenzaría a comentarche isto do casco velho??? Nao sei si visitaches muitos cascos antigos na nosa espanha,pero a verdade que o de Vigo é ……..o que o galego contemporaneo quere de momento,só de momento para iso estades vós…pero tenho as minhas duvidas sobre o proxecto,primeiro espero que non estedes metidos en pelotazos urbanisticos,,agora chegan a Vigo transatlanticos e cada dia chegarán mais…por isso comento o feito,sempre a raiz de un lucro se comezan a organizar cousas,sempre esquezendo as iniciativas das persoas que comenzarón a fazer de bouzas e berbés habita de vivir a costa do mar,pero de outro xeito.Espero que tenhas boas ondas hacia o mar para este proxecto.forza SANTI!!!!!!!!!
———–
RESPOSTA
Aprezado Roberto:
A recuperación do Casco Vello é para min un compromiso político, pero tamén persoal. Teño visitado moitos cascos antigos en moitas cidades e sempre pensei que o noso non tiña nada que envexar, o único que lle faltaba era un pouco de atención. Penso sinceiramente que nestes dous anos e medio esta a ter toda a atención que non tivo en décadas. Aínda queda moito traballo por diante, pero é evidente xa que hai unha transformación en marcha, que o barrio está sendo reconquistado de novo para a cidadanía.
Seica andan xa por aí algúns comentarios falando de irregularidades na nosa xestión no Casco Vello, pero podo asegurarche que nada diso hai. Témome que non son máis que os esforzos dos que non ven con bos ollos que por fin o noso barrio histórico estea empezando a revivir. Pode ser que os seus intereses sexan precisamente os contrarios aos nosos, que non son outros que recuperar o lugar no que naceu a cidade para as súas xentes.
Sei que o tempo nos dará a razón e agardo que ti podas comprobar que fixemos as cousas ben.
Unha forte aperta.
27 de Novembro do 2009 ás 10:06 pm
Ben querido Santi, non temos dubida traballas a prol do casco vello, pero cicais tamén conven facer algo máis por tantos vigueses sen teito que deambulan por esta zona viguesa. A anterior rexidora e agora presidenta da Autoridade portuaria deixo sen a posibilidade de que estas personas durmisen sobre as bancadas para ilo mandou por trabas nos bancos. Non temos albergue para os que vi ven e durmen baixo as estrelas o baixo a choiva e o vento e como é loxico fan as súas necesidades na rúa. Dende a dereita non podemos esperar moito máis, pero a esquerda ten a obriga moral de lograr canto antes un lugar donde poidan descansar, comer e durmir, donde asearse e donde facer o que precisen.
O casco vello que eu saiba non ten nin minxitorio púbrico nin cousa parecida.
Unha aperta e loubanza por o teu interese por a cidade e por non escatimar a túa presenza nunha manifestación como a pasada contra a violencia de xénero.
Agardo resposta que desexo non se demore moito.
———-
RESPOSTA
Aprezado Séneca:
Comparto plenamente as túas inquedanzas a respecto das persoas sen teito. Como ben saberás existía o compromiso da anterior Vicepresidencia da Xunta para abrir un centro de emerxencia social na Gota de Leite, que ía ser algo máis que un albergue. Estaba previsto que tivera tamén comedor, lavandeiría, talleres… Lamentablemente o PP, que agora goberna a Xunta, non considera que iso sexa unha prioridade e decidiu que ese edificio debería ter outros usos. A situación actual é que no Concello contabamos con que este ano estivera xa aberta a Gota de Leite como albergue, pero a Xunta non acepta nin siquera abrila provisonalmente mentras nós buscamos outro lugar para o centro de emerxencia. Estamos tratando de buscar a mellor solución, porque para nós si é unha prioridade que a xente que menos ten, alomenos conte cun lugar no que poder acollerse.
Grazas polo teu comentario. Unha aperta.